Showing posts with label Balak. Show all posts
Showing posts with label Balak. Show all posts

Saturday, March 2, 2013

Kinsa'ng Kamot

Garay Nhejzheenian #1


Kinsa'ng Kamot
February 22, 2013

Kinsa’ng kamot kamot ko’ng nakuyog,
Kinuptan pagkup'tanay'ng matam-is,
Unsa kadto, asa ug kanus-a, 
Naglangkob gihapon sa gihapon,
Mga kagahapon nga daw puno
Sa katam-is, kapait, kaaslum,
Kansang ngabil ngabil ko’ng nahalok
Nga matud pa, "Kini, panghangtud g'yud!"
Apan tataw kaayo ang kadan-ag
Sa panagway'ng bakak sa pamakak--
Mao nga niini'ng kasingkasing
Nikisaw ang hilum nga kasakit.

yogisaponnolumlokg'yudagkaksingkit



Poet's remarks:

Ako'ng tawagon kini nga ginamaan: "Garay Nhejzheenian". Ang katukuran sa hiini nga balak kay susama sa gitawag: blank verse, nga anaa'y pulo ka mga silaba (litok) matag linya. Sa blank verse nga matang sa pamalak kay wala'y limita kung unsa ka taason ang balak, apan kasagaran naglangkob kini siya'g labi'ng diyutay mga pulo'g lima ka wala nagkapareha nga tunada nga mga linya; ug nagbaton kini ug pulo ka mga silaba matag laray--gamit ang iambic pentameter nga ritmo.  

Ang Garay Nhejzheenian kay usa ka katukuran sa balak nga anaa'y pulo ka mga silaba matag linya. Ang katapusa'ng silaba sa kada linya kay managlahi sa uban. Ug ang kinaubosan sa garay sa mao nga balak kay nahimutang ang usa ka laray panagsumpay sa tana'ng kinatapusa'ng silaba sa matag linya--daw og lahi man ug salikwaot. Ako'ng nakita nga usa kini ka pamaagi nga makapaikag ug makapa-interesa gayud, sa pagkatinuod. Kini nga laray kay dili na kinahanglan ang paghulagway o pagpasabot sa bisan unsa man. Gihimo lang kini nako nga lakang sa pag-garay sa pagtuo'ng dugang kini nga panakot sa ako'ng ginama. Paningkamotan nako, sunod puhon, ang pagkab'ot sa paghan-ay nga mahisab'tan ang mao'ng laray sa nahisgot nga panagtapo sa mga pangkatapusa'ng silaba. Tingali kana posible; malisod, apan ako'ng sulayan. Mamahimo'ng usa kini ka dako'ng hagit alang kanako.

------------------

I will call this particular format "Garay Nhejzheenian". This format is similar to blank verse poetry; every line has 10 syllables. Blank verse has no stipulation as to how long, and usually has at least 50 unrhymed lines with 10 syllables each--using iambic pentameter rhythm. To put intrigue into my composition, I made sure that each of the last syllables do not repeat, and placed all the last syllables together at the very end of the poem. I find that to be very interesting and intriguing indeed. I will make sure next time that all these ending syllables will be something that is more comprehensible. Perhaps that's possible. I will try. It will be a very tough challenge for me. 

Garay Nhejzheenian format is a 10 line poem with 10 syllables on each line using iambic pentameter. The last syllable of each line is different from all the others. And at the very bottom of the poem is a one-liner consisting of a string of all ending syllables -- weird as that may seem. It doesn't need to portray or mean anything.  

Copyright © 2013 by Nhejzheen



Friday, March 1, 2013

Panaway



Panaway'ng Matinabangon vs. Panaway'ng Mangil-ad
January 28, 2013


Let some criticism sink in and let some other criticism roll off.

Ang panuki (panaway sa tag-tuki) o batikos kay anaa ra kanato kung unsa kini ka mahinungdanon, nga kung sa uban pa, kini usa ka masay'ponon. Apan, sayop sila! Kung buot hunahunaon, usa kini ka butang nga naghalad ug pagtabang--nga angay nato'ng tagdon, hangpon, dawaton, pamati-on ug hinuktokan; samok, makapatandog ug garbo, makapatuybo ug buhok o sakit man, apan angay kini nga hataga’g bili, pasidunggan, pasalamatan--ug dili yam-iran (ug labing ngil-ad sa tanan, ing'nan dayon, "Suya ka lang!"). 

Pinaagi sa panuki, nga matang sa pagtabang, kay ato’ng mapanaminan kung asa kita nagkulang tungod kay mao kini ang kinabuhe sa kamatuoran. Sa panuki kay nagtimbaya ug hingpit nga kausaban. Wala'y kapasikaran ang ato'ng pagka-anaa ug pagpuyo niini’ng kalibutana kung dili kita andam nga motul-id sa nasuhi nato’ng gilak’tan. Ayaw hikalim'ti nga ang tawo dili perpekto: masay'ponon, may apan, dili putli, dili hingpit ug salawayon nga matang nga pagkatawo. Si kinsa ba kanato nga dili mahinaway o wala'y mahinaway? Managsama ra kita'ng tanan--dili perpekto. 

Ang panuki kay mao ang ligid-tabang ngadto sa kalampusan. Pagkugi, pagpasensya, pagpailob, pagtul-id ug paglahutay lamang ang gikinahanglan taliwala sa kapakyasan ug kasay'panan. Ayaw pagka-deskorahe ug pag-wala sa paglaum. Padayon Pilipino! bisan pa'g sa pulong dabudabuhan kita pag-ayo. Kung kinaugalingon (personalan) na gani ang ipunting nga pandaot (sama sa: bati ka'g nawong, lisngag ka'g ilong, paghikog nalang! mamatay unta ka, ug uban pa), lahi na kana nga butang, mangil-ad--ug dili kana angay tumpangan. Apan kung tan-awon ‘ta sa lamdag nga bahin: anaa'y tawo nga mangil-ad apan anaa man po'y matinabangon. Pasagdahi na lamang ang mga samukan (masuyaon ug hinawayon sa pang-kinaugalingon). Balanseha na lang, igsoon! Laay baya pod kung kahapsay ra ug wala’y drama ang ato'ng atobangon; lingaw man pod kung anaa'y mga tigpamahit. Sagdi lang, sa ilaha'ng pahit sila ra man po'y mapaakan ug matanggong sa kangitngit. Sa tin-aw ug lakbit nga pagka-estorya: Ang dagan sa mangil-ad nga taras molahutay apan mahitumpawak sa pagbati'ng pagka-wala'y kalipay. 

Ang tira sa panuki kay mao ang bida, tirador, sa ato'ng pagpaningkamot nga mapaanindot ang dagan sa kinabuhe ug mapalambo ang ato'ng pagkataw'hanon--sa gama--sa lihok--sa kinatibo'k-a'ng kaugalingon. Walay kabalhinan ug kabaghuan kung pagdayeg lamang ang ato'ng hagkan. Busa, makusganon ako nga moingon: Kini mao ang tin'aw nga pagpatin'aw sa matin'aw nga tan-aw sa panaway sa tagtuki: Isalikway ang sayop nga pagsabot sa pulong "panaway" kung kagustohan mo'ng maumol ang pagka-banga ngadto sa pagka-maayo ug ang pagka-wala'y ayo ngadto sa pagka-malampuson. 


Copyright © 2013 by Nhejzheen

Wednesday, February 13, 2013

Ang Balak sa Magbabalak



Ang Balak sa Magbabalak
Jan. 28, 2013

Ang pag-gama ug balak dili usa ka yano lang.
Ang han-ay naglaray ug linugdang sa naagia'ng:
Matag garay niini kinuptan ug inampingan,
Matag panulbok nagtuldok mga kasinatian.

Dinhe mo mabati ang pagbati'ng lisod hisab'tan,
Dinhe mo mahikap ang hilam nga lisod buhian,
Dinhe mo matilawan unsa ang kahibulongan,
Dinhe mo makit-an daw mahikaplagan ang tanan.

Lakang, tuyok sa dagan o aginod sa orasan--
Hulagway sa luha, katawa, kagot o hupaw man,
Nigamot, niturok: ug nagbunga sa panumdoman;
Nigamot, nihoot sa kasingkasing sa tinubdan.

Sugilanon nagpukaw sa mga nahikatulog,
Sugilanon nagtulisok ug mga paghinuklog,
Sugilanon nga tawhanon ngano'ng may kamatayon,
Sugilanon nagpamatuod kita masay'ponon.

Dinhe mo mahimbisan kiskisan ang hingtungdan,
Dinhe, di' mahikalim'tan nga ikaw tawo ra man;
Managlahi'ng asoy'g tulumanon sa kinabuhe,
Managlahi'ng laraw ug nagkadaiya'ng pagbati.

Mga kaagi'ng buot buy'an sa kinailadman,
Mga pinitik buot mabutyag sa kadaghanan,
Basin diay motaroy pana sa pagkamatarong,
Basin diay makahatag pagtulon-an, dugang po'ng...

Basin diay mogitik hagikhik sa magul-anon,
Basin diay makapahimatngon sa lungsoranon.
Bisan unsa'y rason daro gayud sa kaugmaran,
Bisan pa'g lit-agan, lanitan, tinguha, totokan.

Batikos nagbalikos hapyod nga dili mosimang,
Batikos sa panghinaot gama nga gayud lamang.
Pasumbingay aron matugkad mo'ng kamatuoran,
Pasumbingay 'ron mabati tay-og's kinauyokan.

Copyright © 2013 by Nhejzheen

Sunday, January 20, 2013

nevaeH Heaven




nevaeH Heaven 
19forgotten

O Romeo~


hinigugma ko

langit ko
kalibutan ko
kalipay ko

kung nasayran mo lang

kung nabutyag ko lang
kung nahonghong ko lang
kung nakuptan mo lang

kining kamot ko 

kining dughan ko
kining palad ko 
kining lawas ko

nag-pangaliya

nag-Santa Maria
nag-Santo NiƱo
nag-HesuKristo

sa imong panit

sa gipangandoy 
sa kalipay
sa ako'ng kasingkasing

nga unta mohikap 

mahikap ki'ng dughan 
hikap sa kapalaran
diin hikap gidid-an

ngadto

paingon 
diretso
sa

naghigwa-os nga hypothalamus

kini naghangus 
para ikaw ma-gakus
bugkos niini'ng ako'ng panguros.

O lisod iginhiwa

kung tanlag ang nag-gwardya.
Antuson ko na lamang
--unta mo nahisabtan.
Sa imo'ng mga mata 
wala 'ko gayud na-ila
kung kinsa ka...
sa imo'ng mga ngabil
wala 'ko nahagki 
kung asa ka...
apan nabati ko kato'ng
imo'ng walang kamot
nga nagpahulay sa ako'ng paa,
saghid dap-ig gamay
ubos sa ako'ng hita.

O Romeo! 

Dad-a nalang kining lawas
--apan ibilin kini'ng kalag.
Pusta ug igaid sa baroto,
lawig ngadto sa dunggoanan sa mga patay.
Bugtong paagi lamang kini 
nga mahilayo
ako kanimo 
sa hangtud 
nga pagpahulay.
Dad-a. Palihug lang.

Requiescat an pace


Copyright © 2013 by Nhejzheen

Sunday, December 16, 2012

Bugto



Bugto
December 6, 2012

Sa ako'ng pagbiya wala ako'y lai'ng mahunahuna kon dili--ikaw!
Sa ako'ng paghanduraw wala ako'y lai'ng malantaw kon dili--ikaw!
Sa ako'ng pagpahiyum wala ako'y lai'ng handumon kon dili--ikaw!
Sa ako'ng pagbati wala ako'y lai'ng higugmaon kon dili--ikaw!
Sa ako'ng pakighawid wala ako'y lai'ng pagakup'tan kon dili--dili ikaw.

Copyright © 2012 by Nhejzheen


Lumpia ni Mama


Lumpia ni Mama
December 10, 2012

Gusto ang uban nga makakat'on
Sa niluto-an nga Pilipinhon.
Wo! sa tugas nga tadtaran pa lang
--Mga sagol nagtagad pa gani--
Magpanig-ab na ang mga dalo!
Pastilan! mga tiil manduol;
Bisan baba sa amang mosagbat;
Gani mga tiyan magbagotbot:
Hulat bahala'g sampot mosapyot.
Magpangambak ang mga kulisaw.
Naa'y uban hilum pa sa kagaw,
Diay mga laway gipangtulon.
Uban dili na makapaabot,
Daw labing kagutom ang nitoktok.
Usap mga pagpaniamtiam -
Makapat'yabaw ug himongaan.
Puwerte! ang kalami, matilawan.

Ang kusina kay nagkarambola:
Gamit-pangluto 'ni bisan-asa,
Ug nagkaguliyang ang hitsura.
Niluto ni mama nga lumpia (ahhh!)
Diin sa kaha pa mangimbita--
Kagubkob, kalami ug kahumot,
Manumbalay sa mga kasikbit.
Manilaptilap ang makalabay;
Kay gani kinsa to’ng makalanghap,
Baba magnganga, damgo’g kumbira.
Gana mobuskad: mata mobudlot;
Ngabil mopakpak; ilong molisngag;
Dila mos'limbad; lagus maglaway;
Ngipon mokagot; buhok motugsoy;
Kung "kaon na!", tiil mokaratil;
Kalimotaw daw managsolirap
Ug ang kamot managkitoy-kitoy.

Sa paak ug usa lang ka lamoy,
Singot daw bugbog mura ug yamog,
Managbahakhak 'sab ang tilaok.
Di' kalikayan usahay lang g'yud 
God! kung ang mahibilin diyutay ra…
Dunggan mobagting kung moingon na,
“'Oops, ayaw ug kan-a! sa pari 'na.”

Copyright © 2012 by Nhejzheen


Thursday, October 18, 2012

Higugmaon Ko Pa Gihapon Ikaw Bisan Sa Ako'ng Paglatagaw

Higugmaon Ko Pa Gihapon Ikaw Bisan Sa Ako'ng Paglatagaw

October 13, 2012

Ani-a na pod ako niining payag sa kamingaw,
Naghinuktok ug namasin nga ikaw moduaw.
Apan nidag-um na pod usab kanako ang kalangitan
Nga gidayan-dayanan sa maitum mo'ng kabitoonan.
Nasayod ka man unta niining hilabihan nga pagbati -
Nga kanimo ni-agda apan hugot ikaw nga nagdumili.
Nagpangliti na usab ang dagway sa kapanganoran;
Kini tungod sa imong garbo ug pagka-wala’y balatian.
Nagpadayon pa gihapon ang kasaba sa kahitas-an;
Mga paglagubo - nagdahunog - nikaylap ang pagdalugdog.
Apan ulahi na’ng tanan, - mga paglaum ko napulpog!
Buot ko untang kup’tan ang hinagiban sa kagamhanan
Pero dili ka man makig-uban niining akong kiliran.
Nasayod ko nga ang pagbati mo dili mapugos,
Makiglambigit ni'ng gugma’ng tim-os nga naghigwaos.
Ngano man kining kasingkasing ko imo ma’ng gipahilak?
Mga luha ko’ng gitigum nidagadayday imo lang giyarok!
Namad-an na kining mga mata sa mga pagdangoyngoy;
Sa akong mga pakigbisog ang kayugot ni-asoy.
Makita ko pa ba kaha ang maanindot nga kabuntagon?
Ug matagamtam ang kainit sa adlaw, ugma puhon?
Kung dili pa lang sa imong mga pasalig nga bakak,
Di’ man unta matanggong kining kaugmaon, magusbat!
Sa tiilan, unta sa gugma, diin ako imo lang giyatakan;
Nibarog, usab nahisukamod, ug sa karon nagbangotan.
Pagkatig-a mo ra igo ka ra man lang mopahiyom!
Sa akong mga gipangbatbat imo lang gilamon!
Maayo ka lang mopahimulos sa unod ko’ng balaanon;
Kagustohan mo diay nga ang kalag ko laglagon.
Unsaon naman lang niining binhi nga imong gitisok?
Kinsang amahan nga akong ipaila kaniya, si Barok?
Ayaw damha nga kung siya makamatngon na~
Motagad ug molingi ba kaha siya sa imoha.
Isaad ko kanimo nga kung ako mobiya na,
Ayaw ug hunahunaa nga ako mobalik pa.
Dili ug dili na gayud ako kanimo Dodong matonto
Sa imong pagkahimabaye ug pagka-abusado.
Di’ ‘ko ikagbaylo ang akong galamhan ug kaanyag
Sa dagway mo’ng hudas pa ni Taning ako nasilag.
Akong gipanghinaut nga sa akong paghikalimot...
Lagmit ilubong ko ra ikaw sa dayon ihikot.
Oo gikasilagan ko ikaw! Gikapungtan sa matag-adlaw!
Apan bisan pa man sa akong mga kaligotgot...
Sa akong paglatagaw higugmaon ko pa gihapon ikaw.

Copyright © 2012 by Nhejzheen

Thursday, August 23, 2012

Sa Mga Buta nga Nakakita


Sa mga Buta nga Nakakita
08/09/2012

Katloan kadto sa Hunyo,
adlaw nga Lunes,
ting-bayad sa buhis:
nag-kurbada ang linya;
nagpangulitog ang kabanha;
sa mga pagpangduot,
dagway nagkulismaot. 
(Nagkadaiyang tuyo
Sa mga lumulupyo.)

Niduol ang Mayor.
Gakadako lang ang tiyan;
baba puro ngipon,
dila nga nagtakuban:
mga bakak gipangbatbat,
sa nakadungog - mga wa’y dunggan.

Unsa ba ‘ning tawhana!
Sayod nga lisod si Nanay,
sa hinay-hinay, gilukmay.
Tuo pod intawon ang tigulang.
Sa mga buta nga nakakita
(Ni-abot ang pulis,
nawong ug bangis,
kamot nagkitoykitoy
sa bulsa n’yang kutoy;
nagngisiha, nakighinabi.
Ni bisan isa man lang
wala’y dila nga nitug-an,
nilabtik sa nasaksihan
maski saksi ang kadaghanan.)
pakaaron-ingnon sila: nga estatuwa.

Copyright © 2012 by Nhejzheen

Wednesday, August 22, 2012

Isugilon Ko



Isugilon Ko
June 11, 2012

Anaa’y sekreto.
Ayaw 'ko dudahi
Kay dili 'ni ako.
Saba, ayaw gayud!
Molugsot kang kinsang
Kalimotaw kini
Magusbat sa hangtud!

Baton ko’g higala:
Ang dila niya pula,
Taas ug talinis,
Motusok sa dughan,
Kasingkasing lumsan
Sa dugong mapula,
Pughaw, ug nagsumpay'ng
Puti'ng triyanggulo:
Kinaubsan mao
Ang iyang tinubdan. 

Kini’ng higala ko,
Mata n'ya Langitnon,
Nindot, madanihon;
Sa totok, bulak na’y
Dahon, di' tunokon,
Malarag, mataktak
Sa da'n Kasaypanan
Paingon - (ug kini
g'yud paga-angkonon.)

Ug nasayod ka ba,
Kasingkasing itum,
Pula ug balangaw -
Humot kung mobirig:
Mopasakit s'ya, ug
Mopalipay-lipay
‘Sab sa kundatan nga
Ulagan nga suud,
Silingan ni Kuan,
Palahubo’g hubog!



Copyright © 2012 by Nhejzheen

Tuesday, August 21, 2012

Samtang Nagpaabot


Samtang Nagpaabot
August 14, 2012

Niini'ng payag ta’ng nipa ug kawayan,
sa luyo may nataran nga gipayongan
mo’g mga layang dahon ug mga bulak
--nga tunokon--nag-alirong ug nag-buswak
sa matahum nga baho'ng nangalimyon sa palibot.

Pagkaanindot niini’ng kagabhi-on
Nga nibatikos sa ato'ng kagahapon.
Sa dan-ag sa nagkalayo'ng panagdikit
Nihalok kandila'ng kabugnaw nikudlit;
Sa kahayag, totok sa bulan, tuyo mo’ng gipag’ngan.

Sa ‘kong pag-atobang, mata nasilawan
D’hang nipakita ka sa hangin niuban.
Wa man la’y pahibilin o panamilit;
Gihikaw mo kansang dughan ika’y langit.
Apan kung aninawon, kasingkasing mo naghilak.

Ngano nga dili mo man kini itugyan?
Pagbati mo’ng sa kasingkasing gihabak!
Sagdi lang, ikaw ra man pod ang matuk-an.
Sa gugma nga pulong imo nga gi-lad-ok;
Pagabalonon mo’s lubnganan nga ikaw nagkalot.

Copyright © 2013 by Nhejzheen


Sunday, August 19, 2012

Tahap


Mga Pagtahap
08/15/2012

Sa mga tagoktok sa akong atop,
Sa mga hadyong sa imong tagpi,
Ug sa mga tagingting sa imong sapi,
Nabati ko ang nagsingabot nga bagyo.


Copyright © 2012 by Nhejzheen

Yamog ug Singot


Yamog ug Singot
08/09/2012

Ika'y yamog sa kabuntagon;
Ako'y singot sa kagabhi-on
nga
gipasu-an mo.

Copyright © 2012 by Nhejzheen

Abi Ko Man

Illustration by my son, Fritz

Abi Ko Man
08/02/2012

Nagtagumbol ang dughan ko
pagkakita ko sa imong anino;
Paglingi ko, dili diay ikaw kato.


Copyright © 2012 by Nhejzheen

Gugma'ng Sayop


Gugma'ng Sayop
2007

Ikaw'g ako,
Adto didto;
Hawid-kamot;
Halok, gakos.

Ikaw, tan-aw;
Ako, ulaw;
Ambot ngano,
Hadlok, ako.

Ikaw, hangyo,
Balibad 'ko;
Hangtud, sugot;
Hubo, sapot.

Ikaw, suko!
Libog, ako;
Ako, buntis;
Hain ka, Jess?

Ikaw, langyaw;
B'yaan ako;
Ma ug Pa mo,
Sa 'ko, wa'y gusto.

Pagka-wa'y ayo!
Tulubagon mo,
Di' atobangon;
Pagkalooy ko.






Think for a moment to avoid a lifetime of regret. A few moments of pleasure are nothing compared to unending pain for you and others.


Copyright © 2012 by Nhejzheen



Unta ug Busa


Unta ug Busa
August 2007


Anaa unta’y hugpong ang managkaila; 
Anaa unta’y tagsa ka mga pamilya; 
Anaa unta’y pundok ang mga parente
Diin GUGMA mao'ng hingpit nga haligi. 

Anaa unta’y makanunayo'ng kahayag; 
Anaa unta'y paglaum tin-aw damlag; 
Anaa unta’y pagbati'ng matinud-anon
Sa kangitngit ug ma-dulom nga adlawon. 

Anaa unta’y kasadya ug kalipay; 
Anaa unta’y kalinaw ug kahapsay; 
Anaa unta’y kasuod ug kahi-usa, 
Sa nasud 'ta nga wala'y panaghi-usa. 

Busa, igsoon, managtimbayayong kita!
Ayohon nato ang guba ta’ng demokrasya!
Undangon pangorakot, pagka-dili matinud-anon; 
Pilipino'ng dubok-pamatasan ato nga baghoon.


Copyright © 2012 by Nhejzheen

Hangyo sa Usa ka Nilalang


Hangyo sa Usa ka Nilalang 
August 14, 2007 

Ngano man amahan ug inahan ko 
Mga paghilak ko pinasagdan man ninyo? 
Kagutom, kauhaw, ug pagpasagad, 
Ni'ng anak wa'y hibangkaagan, nag-agad. 

Kasaypanan ko, pagdapat ako'ng nahiaguman;
Pagtabang ko, kasaba ako nga natagamtaman;
Ug pagkatawo ko, wala'y inyo nga pagrespeto.
Unsa man nga matang kamo nga pagkatawo? 

Gipangandoy, ug gihangyo ko kamo: 
Ipabati ang gugma; ipakita ang kahayag;
Ug isaad kanako ang maayo nga paglaum 
Nga ugma damlag, kaugmaon nga hapsay 
Ako nga makab-ot ug makaplag. 

Ginikanan ko, nagasalig ako kaninyo;
Pagtudlo'g pagpangga gikinahanglan ko mismo.
Kamo ang gabayan niini'ng paglawig ko;
Palihug, giyahi intawon 'ko ninyo. 

Ako, bunga taliwala sa inyoha'ng gugma; 
Dili ko tuyo nga mo-butho niini'ng kalibutana; 
Pagplano unta inyo'ng gihunahuna'g gitagana; 
Tunhay'ng pag-alima, kasingkasing mokatawa.



Copyright © 2012 by Nhejzheen

Ikaw


Ikaw
August 14, 2007



Ikaw, hinungdan ni'ng gugma ko'ng hilabihan;
Ikaw ang hulagway nga gidamgo ko kadaghan;
Ikaw mao ako’ng yuta, tubig ug langit;
Ikaw ang simbahon ko hangtud sa kangitngit.

Ikaw, gipas-an ko’ng dugay na nga gi-antos;
Ikaw ang nagpusgay sa prinsipyo ko’ng bug-os;
Ikaw ang nilalang nga sa ako nakaako;
Ikaw, nagahatag sa kasubo ni’ng dughan ko.

Ikaw ako’ng kasakit; pod, ikaw ako’ng kalipay.
Ikaw ako’ng kamatayon; pod, ikaw ako’ng kinabuhe.
Ikaw ako’ng kangitngit; pod, ikaw ako’ng kahayag.
Ikaw ako’ng kapakyasan; pod, ikaw ako’ng paglaum.

Bisan pa man, taliwala niini'ng tanan,
Ani-a ako kanimo andam makig-uban sa kanunay
Paingon sa lapyahan diin ang gugma ‘ta natunhay,
Ug ang balod sa kapalaran, ugay-ugayon sa kahangturan.


Copyright © 2013 by Nhejzheen