Higugmaon Ko Pa Gihapon Ikaw Bisan Sa Ako'ng Paglatagaw
October 13, 2012
Ani-a na pod ako niining payag sa kamingaw,
Naghinuktok ug namasin nga ikaw moduaw.
Apan nidag-um na pod usab kanako ang kalangitan
Nga gidayan-dayanan sa maitum mo'ng kabitoonan.
Nasayod ka man unta niining hilabihan nga pagbati -
Nga kanimo ni-agda apan hugot ikaw nga nagdumili.
Nagpangliti na usab ang dagway sa kapanganoran;
Kini tungod sa imong garbo ug pagka-wala’y balatian.
Nagpadayon pa gihapon ang kasaba sa kahitas-an;
Mga paglagubo - nagdahunog - nikaylap ang pagdalugdog.
Apan ulahi na’ng tanan, - mga paglaum ko napulpog!
Buot ko untang kup’tan ang hinagiban sa kagamhanan
Pero dili ka man makig-uban niining akong kiliran.
Nasayod ko nga ang pagbati mo dili mapugos,
Makiglambigit ni'ng gugma’ng tim-os nga naghigwaos.
Ngano man kining kasingkasing ko imo ma’ng gipahilak?
Mga luha ko’ng gitigum nidagadayday imo lang giyarok!
Namad-an na kining mga mata sa mga pagdangoyngoy;
Sa akong mga pakigbisog ang kayugot ni-asoy.
Makita ko pa ba kaha ang maanindot nga kabuntagon?
Ug matagamtam ang kainit sa adlaw, ugma puhon?
Kung dili pa lang sa imong mga pasalig nga bakak,
Di’ man unta matanggong kining kaugmaon, magusbat!
Sa tiilan, unta sa gugma, diin ako imo lang giyatakan;
Nibarog, usab nahisukamod, ug sa karon nagbangotan.
Pagkatig-a mo ra igo ka ra man lang mopahiyom!
Sa akong mga gipangbatbat imo lang gilamon!
Maayo ka lang mopahimulos sa unod ko’ng balaanon;
Kagustohan mo diay nga ang kalag ko laglagon.
Unsaon naman lang niining binhi nga imong gitisok?
Kinsang amahan nga akong ipaila kaniya, si Barok?
Ayaw damha nga kung siya makamatngon na~
Motagad ug molingi ba kaha siya sa imoha.
Isaad ko kanimo nga kung ako mobiya na,
Ayaw ug hunahunaa nga ako mobalik pa.
Dili ug dili na gayud ako kanimo Dodong matonto
Sa imong pagkahimabaye ug pagka-abusado.
Di’ ‘ko ikagbaylo ang akong galamhan ug kaanyag
Sa dagway mo’ng hudas pa ni Taning ako nasilag.
Akong gipanghinaut nga sa akong paghikalimot...
Lagmit ilubong ko ra ikaw sa dayon ihikot.
Oo gikasilagan ko ikaw! Gikapungtan sa matag-adlaw!
Apan bisan pa man sa akong mga kaligotgot...
Sa akong paglatagaw higugmaon ko pa gihapon ikaw.
Copyright © 2012 by Nhejzheen
Copyright © 2012 by Nhejzheen
Very Nice inday, Pagkatin-awa sa mga pulong walay nakapugong. Angay lang kini ni Dodong namaluibon. Nga si inday nasugamak sa pasalig na bulowanon. Apan usa ra diay kini ka bakak daw siya gilamat sa katam-is niini. Naulipon ug nahubog sa iyang kaanyag. Pagkahupas sa baho sa gugma, daw miuban sa hangin nga wala giagda. Maayo sa pagkahan-ay, daw gihinginlan ang kagahapon sa pagpahulay.
ReplyDeleteSalamat kaayo sa imohang comment, 'migo. Unsa gani imohang ngalan? Nitan-aw 'ko sa imohang blog profile, wala ma'y nakabutang. :) Nalingaw ko'g basa sa imohang gi-post ngari. Lisod ang gugma kay malamaton; tam-is bati-on, pag-ando diay... kapait mao'y motabon. Matud pa sa uban, suwerte-suwerte daw, apan hugot ko'ng ika-ingon: naa ra gayud kana sa hingtungdan. Kita ra mismo'ng tawo mao'y nag-umol, naghulma sa atong kapalaran. Sa mga biniyaan: "It's better to have loved and lost than never to have loved at all." :)
Delete