Niining Ako'ng Nahimutangan

Niini'ng Ako'ng Nahimutangan

November 14, 2012

Niini'ng ako'ng nahimutangan
(Naaninaw ko ang nagsingabot 

Nga ulan nga wala'y kahumanan)

Gidag-uman sa pagbati'ng pait

Pa sa kinabuhe'ng kawad-on da,

Ug nganli ang hingpit nga pag-antus,

Dili ko igkompara, labaw pa!

Kasingkasing ko imo'ng gitigbas;

Napikas, ug: nikagay sa hilak,

Nadugmok sa luha. Bisan pa ug

Imo'ng yam-iran, yatakan - duslak

Niini'ng dughan - kansang kasilag

Wala'y nahimutangan tungod kay

Ang gugma ko kanimo tunhay.

  

Copyright © 2012 by Nhejzheen

- a sonnet

Kung ang Gugma na ni Dodong Kokoy ang Magahari

Kung ang Gugma na ni Dodong Kokoy ang Magahari
October 16, 2012

Bisan pa ug si Brad Pitt ang ipaatubang,
Dili gayud moiswag-abante ang love meter;
Apan sil-ip sa sampot ra gani ni Dodong Kokoy,
Pagkakulba-hinam sa dughan mangoykoy.

Magkaburitsing man ang nawong,
Budlat man ang mata,
Lisngag man ang ilong,
Nagkahiwi man ang ngipon,
Gakusmod man ang simod,
Namyahok man ang aping,
Gaka-butete man ang tiyan,
Gakimpi man ang nilakwan,
Bahala'g buhok wala’y panudlay,
Bisan pa gani wala’y ligo,
Ngipon man wala’y panotbras,
Koko wala’y panghingoko,
Nagkabaho man ang ilok,
Gisi man ang pantalon,
Busloton man ang sinina,
Nagka-lustred man ang brip,
Buslot man ang bulsa,
Wa ma'y sulod ang pitaka,
Bisan pa gani ang ugma - itum pa sa alkitran,
Dili pa gihapon mabangbang ang pagbati ni Badang!
Mga pagpanikad-sikad sa dughan, dili mahisab'tan!
Maski pinaka-maayong doktor ang motambal, dili gayud mauli-an;
Mga paghigwa’os, wala’y paglurang.
Sa laktud nga pagka-estorya - gugma kay makaboang!
Susama sa iro'ng boang...
Kay kung kamo mapaakan, dulot-bukog ang sangputanan.

Hibaw-i gayud!
Kung ang gugma ngadto kang Dodong Kokoy na gani ang binoangan,
Oooooooooo pagbantay mo ni Badang!
Makig-engkuwentro siya'g gamhanan
Basta lang si Dodong Kokoy dili hilab'tan.
Mura ra ba siya'g kublan.
Gakatikig lang ang lawas,
Huyang pa siya sa saging linghud,
Modasdas g'yud!
Basta ang gugma na gani ni Badang mao'y hagiton...
Tago na lang kamo!
Layat sa pinakahabog!
O ba kaha magpakahilum!
Baba ni Badang kay mismong hinagiban -
Makapanlimbahot...
Makigbatok...
Wala'y pagtak-um...
Dili siya gani mamilok.
Kay kung kamo makig-atobang,
Inyong dakong maangkon ang kadaugan sa kapildihan.

Copyright © 2012 by Nhejzheen

X

X
October 8, 2012

Ang wala'y sukod nga pagbati'ng dili matukdad dili masabot dili mapug'ngan dili mabalit'ad dili mapapa sa panumdoman kay makusgano'ng nahigamut sa kinauyokan wala'y kalainan sa dahon sa Kumintang nga kung palpalon hampason padayon nga sa kamot balikason sa baba bun-ogon sa mata sunogon ug sa hunahuna bobo-an sa wala'y pagpakabana kini moinanay sa hinay-hinay hingpit ang tiunay nga pagkahuyang sa kadugayan mapungil! oo mapungil sa wala'y kasiguruan makig-uban sa tayhop buga sa hangin mosayaw sa diyutay mohayang mokulob motakilid motuyok-tuyok mopangka sa bisan-unsa hangtud mouban sa balas abog makigkuyog sa nagpangatagak nagpagpanglupad nga mga dahon gihay sagbot ambot unsa pod hangtud sa kapaingnan mopadulong sa dayon sa hinanali motugdon mopahimutang kini mismo sa yuta tubig kahoy bato unsa ba kaha diin kini andam mopahulay malaya malata madunot makalabera mapulpog sa kamatayon apan kung kini ampingan pagadu-awon pagalantawon pagadayegon ug pagabobo-an sa dako'ng pagtagad inubanan sa mga kupot hikap hapuhap oo kung pagabobo-an lang bisan panalagsa mokidlaw sa adlaw sa bulan ang kaanindot kalunhaw ug kasinaw sa kahayag-kangitngit ug katugnaw-kainit mohangad ngadto sa langit mapasigarbuhon sa kawanangan molungtad mokinlaw ang kaanyag nga kasagaran kana kung wala'y kakulian molahutay ang kinabuhe sa kadugayon nga pagpuyo dinhe sa kalibutan ang kahapsay lintunganay isip bugti sa misteryoso'ng pagbati mao'y magahari.

 

 ……….oooO………

       ………(………)…Oooo…

       ……………)…/……(………)……

       …………(_/ ………)…/…………
   ……………………………(_/…

Copyright © 2012 by Nhejzheen

Bugtong Paagi

Bugtong Paagi

August 02, 2012

Makapahagikhik kanako

‘Ning mga pulong sa gugma.

Botbot nga susama niini:

“Kab-oton ko ang bulan

Ug mga kabitoonan,

Ug igasa ko kanimo, ‘day.”

Dili ba kaha kasakit

Ug kangitngit mao’y idalit?

Halok didto, suntok ngari.

Kung buot hunahunaon -

Sumbingay’ng balaknon,

Apan, hag-as ba?

Daw susama sa pag-inum sa baso

Diin kawad-on mao’y sulod;

Kansang baso ang panudlanan, 

Ug dangpanan sa kasubo, maunlod.

Kapila ko pakli-pakli-a,

Basahon kalabot sa gugma.

Apan kawang lang,

Oras ko’ng may kinutuban,

Sa dili madugay,

Mga luha ko’ng nagadagayday,

Lawas ko mabanlas,

Ug mapapas niining kalibutana.

Busa, Dodong…

Unsa pa ma’y gipaabot?

Saka ka na kikilos kung

Kailan huli na ang lahat?

Kung gugma mo tunhay:

Isugilon, ipabati, ug ipakita.

Dasmag! Bahala pa’g madam-ag.

Wala’y kahadlok. Padayon!

Kab-ota kining mga palad ko,
Biraha, pislita, hapuhapa, hagki...

Hangtod sa maangkon mo kining kalag ko.

Copyright © 2012 by Nhejzheen

Samtang Nagpaabot

Samtang Nagpaabot

August 14, 2012

Niini'ng payag ta’ng nipa ug kawayan,

sa luyo may nataran nga gipayongan

mo’g mga layang dahon ug mga bulak

--nga tunokon--nag-alirong ug nag-buswak

sa matahum nga baho'ng nangalimyon sa palibot.

Pagkaanindot niini’ng kagabhi-on

Nga nibatikos sa ato'ng kagahapon.

Sa dan-ag sa nagkalayo'ng panagdikit

Nihalok kandila'ng kabugnaw nikudlit;

Sa kahayag, totok sa bulan, tuyo mo’ng gipag’ngan.

Sa ‘kong pag-atobang, mata nasilawan

D’hang nipakita ka sa hangin niuban.

Wa man la’y pahibilin o panamilit;

Gihikaw mo kansang dughan ika’y langit.

Apan kung aninawon, kasingkasing mo naghilak.

Ngano nga dili mo man kini itugyan?

Pagbati mo’ng sa kasingkasing gihabak!

Sagdi lang, ikaw ra man pod ang matuk-an.

Sa gugma nga pulong imo nga gi-lad-ok;

Pagabalonon mo’s lubnganan nga ikaw nagkalot.

Copyright © 2013 by Nhejzheen

Yamog ug Singot

Yamog ug Singot

08/09/2012

Ika'y yamog sa kabuntagon;

Ako'y singot sa kagabhi-on

nga

gipasu-an mo.

Copyright © 2012 by Nhejzheen

Gugma'ng Sayop

Gugma'ng Sayop
2007

Ikaw'g ako,
Adto didto;
Hawid-kamot;
Halok, gakos.

Ikaw, tan-aw;
Ako, ulaw;
Ambot ngano,
Hadlok, ako.

Ikaw, hangyo,
Balibad 'ko;
Hangtud, sugot;
Hubo, sapot.

Ikaw, suko!
Libog, ako;
Ako, buntis;
Hain ka, Jess?

Ikaw, langyaw;
B'yaan ako;
Ma ug Pa mo,
Sa 'ko, wa'y gusto.

Pagka-wa'y ayo!
Tulubagon mo,
Di' atobangon;
Pagkalooy ko.

Think for a moment to avoid a lifetime of regret. A few moments of pleasure are nothing compared to unending pain for you and others.

Copyright © 2012 by Nhejzheen