Korongkongho

Korokongho
2009

Pagkabaho mo Korokongho.
Baligya mo ang imong boto.
Panghunahuna mo wa'y klaro.
Ugma mo kay bubarato.

Tagpila man ang imong ugma?
Kantidad nga wa'y hinungdan?
Ang  TUNOB mo gipahimuslan
Sa politiko'ng wa'y kapuslanan.

Suginli ko, Korokongho,
Kung nalipay ka, kinabuhe mo.
Nasud mo, nasud ko, -
Sakit sud-ongon ang kahimtang mo.

Naandan mo nga pagbaligya,
Kumuton na sa imong palad;
Dili na ibulikadkad
Sa salaping makapaunlod.

Ayaw na g'yud hikalimti
Ang panultihon mao kini:
"Pagbaligya sa boto mo
Hinungdanan sa... PANOBORNO!"


Copyright © 2012 by Nhejzheen

Sa Mga Buta nga Nakakita

Sa mga Buta nga Nakakita

08/09/2012

Katloan kadto sa Hunyo,

adlaw nga Lunes,

ting-bayad sa buhis:

nag-kurbada ang linya;

nagpangulitog ang kabanha;

sa mga pagpangduot,

dagway nagkulismaot. 

(Nagkadaiyang tuyo

Sa mga lumulupyo.)

Niduol ang Mayor.

Gakadako lang ang tiyan;

baba puro ngipon,

dila nga nagtakuban:

mga bakak gipangbatbat,

sa nakadungog - mga wa’y dunggan.

Unsa ba ‘ning tawhana!

Sayod nga lisod si Nanay,

sa hinay-hinay, gilukmay.

Tuo pod intawon ang tigulang.

Sa mga buta nga nakakita

(Ni-abot ang pulis,

nawong ug bangis,

kamot nagkitoykitoy

sa bulsa n’yang kutoy;

nagngisiha, nakighinabi.

Ni bisan isa man lang

wala’y dila nga nitug-an,

nilabtik sa nasaksihan

maski saksi ang kadaghanan.)

pakaaron-ingnon sila: nga estatuwa.

Copyright © 2012 by Nhejzheen