Thanks for stopping by! This blog contains primarily Visayan poetry and some pieces in prose, all of which were written by me. All of the artwork, including photos and videos, were created by me, unless otherwise noted.
Kung ang Gugma na ni Dodong Kokoy ang Magahari October 16, 2012
Bisan pa ug si Brad Pitt ang ipaatubang, Dili gayud moiswag-abante ang love meter; Apan sil-ip sa sampot ra gani ni Dodong Kokoy, Pagkakulba-hinam sa dughan mangoykoy. Magkaburitsing man ang nawong, Budlat man ang mata, Lisngag man ang ilong, Nagkahiwi man ang ngipon, Gakusmod man ang simod, Namyahok man ang aping, Gaka-butete man ang tiyan, Gakimpi man ang nilakwan, Bahala'g buhok wala’y panudlay, Bisan pa gani wala’y ligo, Ngipon man wala’y panotbras, Koko wala’y panghingoko, Nagkabaho man ang ilok, Gisi man ang pantalon, Busloton man ang sinina, Nagka-lustred man ang brip, Buslot man ang bulsa, Wa ma'y sulod ang pitaka, Bisan pa gani ang ugma - itum pa sa alkitran, Dili pa gihapon mabangbang ang pagbati ni Badang! Mga pagpanikad-sikad sa dughan, dili mahisab'tan! Maski pinaka-maayong doktor ang motambal, dili gayud mauli-an; Mga paghigwa’os, wala’y paglurang. Sa laktud nga pagka-estorya - gugma kay makaboang! Susama sa iro'ng boang... Kay kung kamo mapaakan, dulot-bukog ang sangputanan. Hibaw-i gayud! Kung ang gugma ngadto kang Dodong Kokoy na gani ang binoangan, Oooooooooo pagbantay mo ni Badang! Makig-engkuwentro siya'g gamhanan Basta lang si Dodong Kokoy dili hilab'tan. Mura ra ba siya'g kublan. Gakatikig lang ang lawas, Huyang pa siya sa saging linghud, Modasdas g'yud! Basta ang gugma na gani ni Badang mao'y hagiton... Tago na lang kamo! Layat sa pinakahabog! O ba kaha magpakahilum! Baba ni Badang kay mismong hinagiban - Makapanlimbahot... Makigbatok... Wala'y pagtak-um... Dili siya gani mamilok. Kay kung kamo makig-atobang, Inyong dakong maangkon ang kadaugan sa kapildihan.
Ang wala'y sukod nga pagbati'ng dili matukdad dili masabot dili mapug'ngan dili mabalit'ad dili mapapa sa panumdoman kay makusgano'ng nahigamut sa kinauyokan wala'y kalainan sa dahon sa Kumintang nga kung palpalon hampason padayon nga sa kamot balikason sa baba bun-ogon sa mata sunogon ug sa hunahuna bobo-an sa wala'y pagpakabana kini moinanay sa hinay-hinay hingpit ang tiunay nga pagkahuyang sa kadugayan mapungil! oo mapungil sa wala'y kasiguruan makig-uban sa tayhop buga sa hangin mosayaw sa diyutay mohayang mokulob motakilid motuyok-tuyok mopangka sa bisan-unsa hangtud mouban sa balas abog makigkuyog sa nagpangatagak nagpagpanglupad nga mga dahon gihay sagbot ambot unsa pod hangtud sa kapaingnan mopadulong sa dayon sa hinanali motugdon mopahimutang kini mismo sa yuta tubig kahoy bato unsa ba kaha diin kini andam mopahulay malaya malata madunot makalabera mapulpog sa kamatayon apan kung kini ampingan pagadu-awon pagalantawon pagadayegon ug pagabobo-an sa dako'ng pagtagad inubanan sa mga kupot hikap hapuhap oo kung pagabobo-an lang bisan panalagsa mokidlaw sa adlaw sa bulan ang kaanindot kalunhaw ug kasinaw sa kahayag-kangitngit ug katugnaw-kainit mohangad ngadto sa langit mapasigarbuhon sa kawanangan molungtad mokinlaw ang kaanyag nga kasagaran kana kung wala'y kakulian molahutay ang kinabuhe sa kadugayon nga pagpuyo dinhe sa kalibutan ang kahapsay lintunganay isip bugti sa misteryoso'ng pagbati mao'y magahari.
Kalangitan, mando-i, pakisayri ako! Taghoy sa hangin, tingog sa kahilom, kini nagpadayon. Nagpatim-aw, nagpatigbabaw - kasilag sa adlaw; Ug kadaut sa maanindot ko'ng kinabuhe'ng hapsay.
O langit ko, dungawa ako. Ipakita ang pinakakusog nga liti ug bagyo. Buhata! himo-a! kutob sa imong mahimo - Para maamgo ko gayud ang sayop ko'ng nahimo.
Pinangga ko, pasaylo-a ako. Dili ko tuyo ang pagpanapaw kanimo. 'Sayod ka kahimtang maoy kabasulanan. Apan nasayran mo unsa ang matuod nga hinungdan.
Hinungdan, o hinungdan... ngano man?! Nipatim-aw ka man ni'ng among kiliran sa kapakyasan. Ikaw man unta ang dugang, awit sa kalanggaman, bulak sa tanaman: ug kalipay nga hilabihan.
Tingog mo'g tingog ko kini naghagawhaw; Sama sa balod, mokuso ako, ikaw molingaw. Salamat pinalangga apan nahisab'tan mo ba? Mangtas mo'ng hinigugma, kangil-ad ba, kangil-ad!
Tabang! mahal ko, ako moingon. Dili pa igo ang imong pagabuhaton. Makagagahum mo, tanlag ko - mao ra'y paglaum; Sa maayo'ng kaugmaon diin ato nga maangkon.
