Kalimti ang Ugma ug Hinumdomi ang Karon

Kalimti ang Ugma ug Hinumdomi ang Karon
August 26, 2012

Kalimti ang ugma ug hinumdomi ang karon
Aron sa gihapon ang kagahapon kanato modumdom:

Kini'ng gilakwan 'ta mao ang padul'ngan;
Sa mga pagsukwahe, mamahimo'ng ang dalan
– Gisaw'an sa hilabihan sa matag karon ug unya –
Sa kanunay, mahanaw ug mawagtang sa unahan:
Ug ang kawad-on sa kalipay mosayaw kanunay.

Nganhi, duol kanako. Subayon 'ta ang dalan
Paingon sa bungtod: sa subangan sa adlaw
Nga kanato nangandam, nagpanil-ip sa gilay'on
– Didto ang puti ug higante'ng kahoy magapaabot –
Mao'y mosalimbong, mopandong, ug mohiusa
Sulod sa ato'ng tunhay ug talagsao'ng himaya.

Isambilay ang tuo'ng kamot ni'ng buko-buko
Samtang matanyagan pa sa mga hikap ug kupot.
Human, sapwanga ang ako'ng likod ug sampot,
Sa naglagubo'ng panganod dili ako mahulog –
Matanggong sa pahamtang gugma'ng-silot.

Iwakli ang sagbot nga mosaghid sa akong saya,
Binurdahan sa engkahe'ng mataas-manipis-maputi
(Mokidlaw sugat sa dan-ag sa bulan nga nanghupaw)
Nagsagyad sa lunhaw, halapad, malumo'ng hawan--
Kanhi inalirongan sa mga bulak nga namulikadkad.

Sa dahunog sa tunob, tindak! sa namad'a'ng yuta, –
Nagnganga, nagahulat sa pinisik sa tubig-ulan.
Bantay sa gilakwan, sa palibot – mga mata – kita
Gipanid-an sa mga mabantayong kahayupan;
Sa kadanghag, mahitabo'ng mahunlak ang agi-an.

Singhagi ang kahoy nga mokab-ot sa ako'ng belo;
Tangagon unya kini sa maigmat, tabuno'ng uwak
– Sa matag adlaw siya ga-tugdon sa sanga'ng luyat –
Ginapasundayag sa wala'y salinsing, dahon ug bulak
kansang puno-an binubu-an sa wala'y pagtagad.

Tayhopa ang kangitngit nga motabon sa mata;
Sa dan-ag: mopadayag ang pagpamulak-pamunga.
Ibuka sa kanunay ug itotok ang panan-aw;
Lipaya ang kalimotaw: mga pilok ipaghalok,
Sud'onga ang nagsud'ong, ug sa panganod kini dad-a.

Ayaw ug lingi-a ang mga sitsit ug hadyong;
Bawi-on ang nasugdan ta'ng gisugdan 'ta karon.
Hunahunaa sa wa'y duhaduha ang tumong ug tingoha.
Ipunting sa padul'ngan, sampongi ang dalunggan,
Ablihi ang kasingkasing ug ibuga ang kamatuoran.

Ayaw ug paminawa ang kasaba sa langit,
Sa dugayon ang dag-um mohupay sa hingpit;
Sa ka-silaw sa adlaw ug ka-dan-ag sa bulan,
Motuwit-tuwit ang tabuno'ng uwak kuyog sa uban–
(Mutugdon, molupad; sa bisan-asa, mosayaw sila).

Copyright © 2013 by Nhejzheen