Monday, January 7, 2013

Alagad

Alagad
January 5, 2013

O ulipon sa panglingla, 
sa wali sa sapi ikaw mosimba; 
ihiklad kay imoha’ng ibuklad
ang pag-alagad nga
wa'y nada.

Katilingban sa kahilum,
amang gani bisan pa’g bukbokon;
unsa pa kaha'g saksi lang
sa hiwi mo'ng pangagamhanan kini
motaho o mopasaka?

Lungsoranong Pilipinhon,
sa totok sa lihok-krimen kini mobuy-od;
suknaon kay moyambi ang ngabil, ug dila
motiglum sa pamolitikanhon mo'ng
dunot.

O alagad sa panglingla,
sa supot sa pangorakot ikaw manupot;
maabot ra ang takna nga ang mga gutlo
mopisat kanimo nga sa kanamo
ali-luy-a! 

Oo, dia ako, maghulat kanimo.
Hala lubaa! kay kini'ng ako'ng tingog
sa kanimo mosonata. Prisoha! kay sayawan ‘ta ka
niini'ng mahait ko’ng nasudno'ng
gugma.

Copyright © 2013 by Nhejzheen

7 comments:

  1. Awesome Inday! Kanus-a pa kaha ning mga kurakot ug badlongon nga mga politiko magbag-o ug maghinolsol sa ilang mga kasaypanang gibuhat.Aduna baha ni silay balatian.

    ReplyDelete
    Replies
    1. Salamat kaayo sa imohang gikasulti, Eric! Isip tubag sa imo nga pangutana: Ayha ra sila mausab kung kitang mga lungsoranon mahigmata... magkahiusa... ug dayon mohimo'g makusganong lakang batok sa ilahang mga hiwing binuhatan. Kon ugaling dili, magpadayon pa gihapon ang ilahang pagka-wala'y hinungdan ug pagka-kiriwan ug kawatan sa kaban sa katilingban. Anaa sila'y pagbati apan nibagtok na. :)

      Delete
    2. Kalimti ang pagdumala kay mao kana'y pinaka-ulahi sa ilahang listahan. :(

      Delete
    3. Ang mabasol ra gayud niining tanan, ang mga katawhan ang nagpili na makalingkod sila sa ilang pananggamhanan. Apan unta kitang tawo, kung nasipyat man gani kita sa unang higayon sa pagpili kanila, wala na untay ikaduha o ikatulo na masipyat pa ta pagpili ug dili na sila padag-on sa sunod. Apan ang nakaparat niini wala man say modagan makigbatok kanila kung naa man pildihon man sad sa kuwartahay. Mao nang Makadaug lang gihapon kay unahon ang makasilaw na kuwarta sa temporaryong kalipay. Kini ang tinubdan ning atong kalisod sukad pa kaniadto. Ang ako lang gayud wala makatabang kanato kon dili kita ra gayud. Matag-usa kanato magbag-o sa atong kinabuhi..sa MAAYONG kinabuhi dili ang pagpanikas o makaBINTAHA ta sa uban. Kung kita nagmahal ug mitoo sa atong pagka kristiyano sa pangalan sa Dios, walay imposibli kung dili kini nato mabuhat. Ang Kausaban magsugod maggikan sa atong kaugalingon. Daghang Salamat inday Nhejz. Ang mataron maoy mapatigbabaw ning tanan uban ang Dios na atong giampoan sa tanan.

      Delete
  2. Hi nhejzheen ...nindot kaayo...,

    ReplyDelete
  3. Insakto gayud kaayo ka, Eric. Kita ra mismo o ang matag-usa ra kanato ang makapitol sa mga hiwing binuhatan sa uba'ng mga puwera gaba'ng mga politiko. Unta anaa g'yuy lihok batok sa mga kriminal nga mangawkaway sa kaban sa lungsod apan minus ko'ng mahidunggan. Kung usbon lang gayud nato unta ang ato po'ng hiwing naandan sama sa pagbotar sa mga wala'y hinungdan (vote buyers), anaa gayu'y dako'ng kausaban nga maghulat sa unahan. Kita pod mismo'ng mambutaray, kung did'an lang g'yud unta nato ang ato'ng kaugalingon sa pakiglambigit sa pangorakot sama sa pagbaligya sa ato'ng boto, minus g'yud unta ang pangorakot ug lihok-krimen sa pamolitiko. Salamat kaayo, Eric. :)

    ReplyDelete

Salamat sa pagbasa, higala. Ingna kuno 'ko kung unsa ang imo'ng ika-estorya. Ug suginli unya pod 'ko kung unsa ang imo'ng gusto'ng ipadayag o i-sugyot nganhi. Bililhon kaayo kanako ang imo'ng ikasulti. Palihug ayaw unya kalimot sa pag-JOIN ug/o SUBSCRIBE sa akong blog. Salamat kanimo, kababayan!

Mahinungdanon: Kung anaa man ugaling ako'y nahimo'ng sayop, typographically, o unsa ba dinha, i-awhag unya palihug ang ako'ng pagtagad. Dako kaayo'ng ikatabang ang imoha'ng pagsugilon, ug dugang pod usab kini nga mapausbaw ang ako'ng katakus sa pagsulat. Daghan kaayo'ng salamat!